ನವದೆಹಲಿ: ಗಲ್ಫ್ ರಾಷ್ಟ್ರಗಳ ಸಂಘರ್ಷ ತಾರಕಕ್ಕೇರಿದ್ದು, ಲೆಬನಾನ್ನ ಜನವಸತಿ ಪ್ರದೇಶಗಳ ಮೇಲೆ ಇಸ್ರೇಲ್ ಅತ್ಯಂತ ಅಪಾಯಕಾರಿ ‘ವೈಟ್ ಫಾಸ್ಫರಸ್’ (ಬಿಳಿ ರಂಜಕ) ಬಾಂಬ್ಗಳನ್ನು ಬಳಸಿದೆ ಎಂಬ ಗಂಭೀರ ಆರೋಪ ಕೇಳಿಬಂದಿದೆ. ಇರಾನ್ ಬೆಂಬಲಿತ ಹೆಜ್ಬುಲ್ಲಾ ಗುಂಪುಗಳ ದಾಳಿಗೆ ಪ್ರತಿಯಾಗಿ ಇಸ್ರೇಲ್ ನಡೆಸಿದ ವೈಮಾನಿಕ ದಾಳಿಯಲ್ಲಿ ಈ ವಿಷಕಾರಿ ರಾಸಾಯನಿಕ ಬಳಕೆಯಾಗಿದೆ ಎಂದು ಅಂತಾರಾಷ್ಟ್ರೀಯ ಮಾಧ್ಯಮಗಳು ವರದಿ ಮಾಡಿವೆ.
ವಿಶ್ವಸಂಸ್ಥೆಯ ಕೆಂಗಣ್ಣು
ನಾಗರಿಕ ಪ್ರದೇಶಗಳಲ್ಲಿ ಬಿಳಿ ರಂಜಕದ ಬಳಕೆ ಅಂತಾರಾಷ್ಟ್ರೀಯ ಮಾನವ ಹಕ್ಕುಗಳ ಉಲ್ಲಂಘನೆಯೆಂದು ಪರಿಗಣಿಸಲ್ಪಟ್ಟಿದೆ. ಈ ಹಿಂದೆಯೂ ರಷ್ಯಾ-ಉಕ್ರೇನ್ ಯುದ್ಧದಲ್ಲಿ ಇಂತಹ ಅಸ್ತ್ರ ಬಳಕೆಯ ಬಗ್ಗೆ ಆತಂಕ ವ್ಯಕ್ತವಾಗಿತ್ತು. ಮಾನವ ಹಕ್ಕುಗಳ ಕಾರ್ಯಕರ್ತ ರಾಮ್ಜಿ ಕೈಸ್ ಈ ಬಗ್ಗೆ ಪ್ರತಿಕ್ರಿಯಿಸಿ, “ವಸತಿ ಪ್ರದೇಶಗಳಲ್ಲಿ ಇಂತಹ ರಾಸಾಯನಿಕ ಪ್ರಯೋಗ ಮಾಡುವುದು ಕಾನೂನುಬಾಹಿರ ಮತ್ತು ಇದು ಸ್ಥಳೀಯರ ಮೇಲೆ ದೀರ್ಘಕಾಲದ ಭೀಕರ ಪರಿಣಾಮ ಬೀರುತ್ತದೆ” ಎಂದು ಎಚ್ಚರಿಸಿದ್ದಾರೆ.
ಏನಿದು ಬಿಳಿ ರಂಜಕ? ಇದು ಏಕೆ ಇಷ್ಟು ಅಪಾಯಕಾರಿ?
ಬಿಳಿ ರಂಜಕವು ಒಂದು ಶಕ್ತಿಯುತ ರಾಸಾಯನಿಕವಾಗಿದ್ದು, ಫಿರಂಗಿ ಅಥವಾ ಬಾಂಬ್ಗಳ ಮೂಲಕ ಇದನ್ನು ಸ್ಫೋಟಿಸಲಾಗುತ್ತದೆ. ಇದರ ವಿಶೇಷತೆಗಳೆಂದರೆ:
- ತೀವ್ರ ಶಾಖ: ಇದು ಆಮ್ಲಜನಕದ ಸಂಪರ್ಕಕ್ಕೆ ಬಂದ ತಕ್ಷಣ ಉರಿಯಲು ಪ್ರಾರಂಭಿಸುತ್ತದೆ. ಈ ವೇಳೆ ಸುಮಾರು 815°C ಗಿಂತಲೂ ಹೆಚ್ಚಿನ ತಾಪಮಾನ ಸೃಷ್ಟಿಯಾಗುತ್ತದೆ.
- ಸಜೀವ ದಹನ: ಆಕಾಶದಿಂದ ಬೆಂಕಿಯ ಉಂಡೆಗಳಂತೆ ಬೀಳುವ ಈ ರಾಸಾಯನಿಕವು ಮನುಷ್ಯರ ಮೇಲೆ ಬಿದ್ದಾಗ ತಕ್ಷಣವೇ ಚರ್ಮ ಮತ್ತು ಮಾಂಸವನ್ನು ಸುಟ್ಟು ಹಾಕುತ್ತದೆ.
- ಹರಡುವಿಕೆ: ಇದರೊಂದಿಗೆ ರಬ್ಬರ್ ಮಿಶ್ರಣ ಮಾಡುವುದರಿಂದ ಇದು ಅಂಟಿಕೊಳ್ಳುವ ಗುಣ ಹೊಂದಿರುತ್ತದೆ, ಇದರಿಂದಾಗಿ ಬೆಂಕಿಯನ್ನು ನಂದಿಸುವುದು ಕಷ್ಟಕರ.
ಆರೋಗ್ಯದ ಮೇಲೆ ಬೀರವ ಪರಿಣಾಮಗಳು
ವಿಜ್ಞಾನಿಗಳ ಪ್ರಕಾರ, ಬಿಳಿ ರಂಜಕದ ಹೊಗೆಯನ್ನು ಉಸಿರಾಡುವುದರಿಂದ ಶ್ವಾಸಕೋಶದ ವೈಫಲ್ಯ, ಅತಿಯಾದ ಕೆಮ್ಮು ಮತ್ತು ಉಸಿರಾಟದ ತೊಂದರೆ ಕಾಣಿಸಿಕೊಳ್ಳುತ್ತದೆ. ಇದು ಮನುಷ್ಯನ ನರಮಂಡಲವನ್ನು ಹಾನಿಗೊಳಿಸುವುದಲ್ಲದೆ, ಮೂಳೆಗಳು ಕೊಳೆಯುವಂತೆ (Phossy jaw) ಮಾಡುತ್ತದೆ.
ಇತಿಹಾಸ ಮತ್ತು ನಿರ್ಬಂಧ
ಎರಡನೇ ಮಹಾಯುದ್ಧದ ಸಮಯದಲ್ಲಿ ಶತ್ರು ಸೈನಿಕರ ದೃಷ್ಟಿ ಮರೆಮಾಚಲು ‘ಹೊಗೆ ಬಾಂಬ್’ ಆಗಿ ಇದನ್ನು ಬಳಸಲಾಗುತ್ತಿತ್ತು. ರಾತ್ರಿ ವೇಳೆ ಹಗಲಿನಂತೆ ಬೆಳಕು ನೀಡುವ ಸಾಮರ್ಥ್ಯ ಇದಕ್ಕೆ ಇರುವುದರಿಂದ ಯುದ್ಧ ಭೂಮಿಯಲ್ಲಿ ಅಸ್ತ್ರವಾಗಿ ಬಳಕೆಯಾಗುತ್ತಿತ್ತು. ಆದರೆ, ವಿಶ್ವಸಂಸ್ಥೆಯ ಪ್ರೋಟೋಕಾಲ್ ಅಡಿಯಲ್ಲಿ ನಾಗರಿಕರ ಮೇಲೆ ಇದರ ಬಳಕೆ ನಿಷೇಧಿಸಲಾಗಿದೆ. ಈ ಹಿಂದೆ ಇರಾಕ್ ಮತ್ತು ಅಮೆರಿಕ ನಡುವಿನ ಸಂಘರ್ಷದಲ್ಲೂ ಇದರ ಬಳಕೆಯ ಬಗ್ಗೆ ವಿವಾದಗಳು ಎದ್ದಿದ್ದವು.
